【順便智能櫃部落格】

【順便智能櫃部落格】

成日話順便智能櫃遍佈全港九,新界離島都有,但往往有唔少朋友都會追問我哋其實各區嘅智能櫃位置喺邊度。喺解答你哋嘅問題同時,小編們真係要熟晒香港18區,話晒而家智能櫃都超過200台,喺解答大家問題嘅同時,不如順便都介紹一下智能櫃周圍嘅好去處,例如嗰個地區嘅隱世小食 (或大食),特色景點。所謂嘅景點,對於住喺該區嘅居民嚟講可以喺好無聊,但對於誇區嘅朋友仔,絕對有機會相等於發現新大陸一樣咁神奇刺激、樂而忘返嘅後樂園。

 

香港,一個好細嘅地方,但相信好多地方你都未曾去過。平時你去日本、韓國、泰國多過你搭車去新界西、南區,不如就畀我哋幾個小編,用文字帶大家去試下不同區域新鮮出爐嘅蛋撻、奶茶,尋找一下不同區域嘅景點,同大家一齊認識一下香港。

 

 

【皇后大道西行】

作為第一編blog,由小編C帶大家遊下香港區,而小編比較喜愛「食」,所以其後見到嘅所有blog都會有關係到食嘅嘢,希望大家鍾意。

P.S. 大家知道啲地道美食,請絕對要介紹畀我 – 小編C

 

是咁的,小編家姐一直喺太古廣場做sales嘅,有一日去探佢跟手就同佢去咗西環嗰邊搵多一個朋友去High 個tea。本身約咗朋友K去西環地鐵站等,點知牛屎妹搭巴士去到上環我先發現 – 原來呢個世界係無西環站!!!點算好呢,離約會時間已經係負5分鍾,我唯有打畀朋友K認衰仔,再問下可以邊度集合,點知,佢竟然同我講,佢都以為有西環站!!!最後,喺大家都以為有西環站嘅情況下我哋約咗係「西營盤站」度集合,一個好開始…

 

作為順便智能櫃嘅小編,梗係要硬sales 一下智能櫃嘅,時間關係,小編我喺前幾日網購咗一個袋仔,見呢個星期會約朋友去呢一個咁小到達嘅區域,梗係順便嚟視察下業務啦!

文咸東街

上環文咸東街50號G18號舖(LaundrYup洗衣店) 順便智能櫃

入到鋪頭,入完個取件碼,等櫃門彈開,十秒鐘都唔駛就攞到我個靚靚袋仔,最緊要一定係唔駛排隊,因為再等耐啲我諗朋友K會殺死我… 袋已拎,返屋企再詳談開箱 (о´∀`о)

西環特式樓宇

由上環行去西環感覺好有趣,完全感受到香港嘅特式之處,一棟豪宅嘅對面就係一座又一座危樓。

肥貓貓

危樓下除咗有最出名嘅海味街,仲有好多貓貓,而貓貓又好鐘意偷食,香港無論係人同貓都咁鐘意偷食… 

西營盤站

行咗差不多15分鍾,終於喺西營盤站遇到了朋友K。西營盤站好新淨,話晒都係新起嘅,唔新淨就大獲啦。

無限斜路

見到啲斜坡我真係睇唔透啲老人家點樣去街市買餸,喺睇唔透之際發現原來我都要行呢條斜坡,呢一刻我睇唔透我點解要嚟呢度…行完一條珠峰級嘅斜坡,主菜嚟喇,我哋要食嘢喇!話說朋友K 係阿豬媽啲Friend,所以我特登搵間荀嘢益佢。呢間嘢喺早前已經上網睇過,好似幾靚,仲有個花園仔,d 嘢夠哂韓夠哂fusion,就睇下你咩料先!

後花園

有位店員疑似係韓國Oppa, 要用英文溝通,唔駛講嘢,加分先!轉個靚身,嘩!真係有個小庭院!!! 可惜最靚嘅位已經畀人霸咗,所以我哋只可以碌番入去冷氣位。舖入面除有少量board game 可以借嚟玩,仲有大量影相嘅道具可以借用︰有自拍神棍,韓國bearbear,宮廷扇等等,畀你做一陣大長今咁樣。

韓式三文魚飯

終於到戲肉喇,開飯喇!

飯: 阿豬媽朋友話呢個飯非常傳統,食落去啲飯粒粒分明,蛋有蛋香,辣汁好香又唔會太辣,三文魚仲係我哋港女最愛,加分!

 

飲品: 朋友個杯係濟州橙茶, 而我就係韓山什莓茶, 杯嘢算好香提子味, 利賓納啲Friend,但就無咁人工味道。

香蕉麻薯窩夫

甜品:小編就係為咗甜品而嚟!!! 聽人講呢個招牌菜嚟,應該唔錯嘅。食完我只能夠話真係好唔錯!!!雖然有點小貴,不過真係幾好味! Mochi 麻薯係我嘅最愛。加埋入pancake 入面,又脆又軟,再加上d 雪糕好creamy 好香,十分唔錯。

 

老實講小編真係麻麻哋韓國嘢(Oppa 除外), 因為始終係食肉獸又唔食得辣,但呢間嘢就顧及到我同阿豬媽朋友嘅口味,有韓有西,要mix 有mix,menu 夠哂搞笑得意,閒時仲可以用d 道具瘋狂自拍,再唔係就可以借下board game 玩,一路玩一路偷昅靚仔Oppa,一句講哂,呢個tea 真係夠哂relax !

離開舖頭時,見到隔離有間好出名嘅台灣嘢,雖然飽到爆,但都係忍唔到入去叫嘢食,哈哈哈哈。

台灣小食店

 

因為真係好飽,2個人叫個芋圓同刈包就算。

台灣刈包

個刈包好好味,入面塊豬肉好入味,加埋少少花生碎,好香口。

足料芋圓

芋圓都足料,粒粒大芋圓同紅豆,唔會話太甜,啱哂個肚就爆嘅我哋。

西環匯倫工商業大廈西環SOLO地下G80-81號舖 順便智能櫃

食完返去西營盤站,順便又見到個順便智能櫃。其實智能櫃喺西環Solo嘅舖頭入面,非常易搵,喺附近嘅居民有福啦,因為喺智能櫃攞件可以慳番上門附加費喎。估唔到Solo都幾多嘢行,全部小店,啲嘢夠哂特色,買完番去都唔怕同人撞。

燈燈燈凳..

 

飲飽食醉後,返到屋企第一時間嚟個開箱文。福袋 $388 – 包一個散子包,一個頭飾同一個袋。包裝精美,商家用一個順豐袋再包住一個紙袋仲要包和紙。

 

手作頭飾x2

頭飾可以畀你揀款,小編我就揀左叮叮款, 遲啲去日本著和服就唔駛畀人劏到一頸血。

日式手袋仔

袋 – 可以自由配,可以畀你揀花布,要唔要手抽位,流蘇位都可以揀色, 真係幾靚好Elegant,平時出街都啱用,仲要唔算難襯!

 

第一編blog就係咁先,今日帶大家去咗一個小編未去過嘅地區,當然,就啱時間仲去咗嗰面自取件,食到個肚爆炸咁濟,絕對係美好嘅一日。我哋嚟緊會不斷帶大家去唔同嘅地方飲飲食食,行街買衫,吃喝玩樂,仲會介紹唔同嘅商品,記得得閒留個言同我哋chit chat 下,分享下你嗰區嘅特色景點啦。

#西營盤 #食嘢 #牛屎妹出城 #最愛香港 #美食之都 #Shopaholic

Tagged , , , , , .