個性化智能櫃 – H852K021P 紅磡老龍坑街 (Ewash)

[紅磡老龍坑街(Ewash)] H852K021P

紅磡

講起紅磡,自然會諗起民間美食。以前去紅磡,只有紅磡站一個鐵路站,去紅磡灣就只可以靠腳骨力。今日嘅紅磡,由三個鐵路站以鐵三角形式包圍 – 紅磡站、何文田站、黃埔站。今日小編就帶大家由何文田站出發,邊攞件邊食野去到黃埔站離開。

 IMAG0317

達到何文田站,喺A2出口出經過天橋一落就到達蕪湖街,向右望嘅自助洗衣舖就係我哋順便智能櫃所在地。攞完件繼續沿蕪湖街行,到達民泰街交界,會見到唔少日式餐廳,不過小編今日目標明確,所以留番下次先試喇。嚟到目的地,本來滿懷歡喜開大餐,點知竟然無開…閘上面貼住逢星期一休息,但嗰日係星期日嚟…真係睇唔透。

 IMAG0327IMAG0333IMAG0324

見個肚有少少餓,把心一横,一於試下隔離間雞翼店。就咁睇價錢確實唔平,但一場嚟到,點都要試下啦!落單之後等咗大約十分鐘,就有得食。精緻嘅包裝可以加唔少分,但嘢食講到底梗係味道最重要。打開個盒,入面分開咗醬同雞翼之餘,竟然仲有…手套!用手食雞真係最高享受,配套絕對值得加分。更令我喜出望外嘅係,啲雞翼熱辣辣,皮脆肉嫰。唯一美中不足就係要分開點醬,感覺上本身雞翼好似唔太入味。Overall,呢間「不要儀態…只想吃雞翼」唔錯,都算塞翁失馬,焉知非福,隔離嗰間我幫襯不能,反而令我發現一間好嘢,下次一於帶埋老友來食,試哂咁多口味先。

 IMAG0344

嚟到紅磡拎件,無理由唔食埋呢度馳名嘅漢堡包。你問我質素有無因為搬咗新舖而變呢?唔Sure,因為我叫嘅係節日套餐,得番個簡單版漢堡包,所以一定無正常版咁豐富。不過想講嘅係,似乎轉咗新地方後,人情味確係減少咗。枱櫈太過新式喇,始終去過舊址嘅我都有啲唔習慣。

IMAG0342

食飽就可以喺黃埔站搭車離開,唔再好似以前咁要老遠地行番去紅磡站。智能櫃寶寶就算分身600幾個喺香港唔同地方,佢都一如以往,情懷未變咁服務大眾。

 

去睇睇其他櫃機

Tagged , , , , , , .